இதென்ன நாடகம்?


எஸ். ஜயலட்சுமி

கோயில் பிரகாரத்தில் நடந்துகொண்டிருந்தேன். மாமி, மாமி என்று யாரோ கூப்பிடும் குரல் கேட்டு திரும்பிப் பார்த்தேன். சுமார் இருபது வயது மதிக்கத்தக்க ஒரு பெண் வேகமாக என்னிடம் வந்தாள் ”மாமி ரொம்ப நாளா ஒங்ககிட்ட கேக்கணும்னு நெனச்சேன். எனக்கு சுலோகம் சொல்லித் தரேளா?” என்று கேட்டாள்.

Image result for மாமிகள்அந்தப் பெண்ணை இதற்குமுன் பார்த்ததாக நினவில்லை. நீ யாரும்மா? தெரியலையே” என்றேன்.

“என் பேர் கமலி. ஒங்ககிட்ட ரொம்பநாளா கேக்கணும்னு இருந்தேன் இன்னிக்கு எப்படியும் கேட்டுடணும்னு தீர்மானம்பண்ணி கேட்டுட்டேன்.  எனக்கு சுலோகம் சொல்லித் தரேளா?”

“நான் சுலோகம் சொல்லித் தரதா யாரு சொன்னா?”

“யாரோ சொன்னா, நெனவில்லை.”

கோவிலில்வைத்துக் கேக்கறாளே, என்ன சொல்வது?

“ஒனக்கு என்ன சுலோகம் வேணும்?”

“பெருமாளப் பத்தி,”  என்றாள்

“சரி நாளைக்கு வா.  எங்க ஆம் தெரியுமா?”

“தெரியும் மாமி.”

நான் வண்ணார்பேட்டை வந்து சுமார் ஒரு வருடம்கூட ஆகவில்லை. இன்னும் ரொம்பப்பேரிடம் பழக்கமாகவில்லை. அதற்குள் இந்தப் பெண் என்னைப்பற்றி எப்படித் தெரிந்துகொண்டாள்? சுலோகம் சொல்லித் தருவேளான்னு கேட்கும் அளவுக்குத் தெரிந்துவைத்திருக்கிறாளே! பரவாயில்லை. கொஞ்சம் சூட்டிகையாக இருக்கிறாள், சரி, நாளை கேட்போம் என்று நினைத்துக்கொண்டேன். கொஞ்சம் ஆச்சரியமாகவும் இருந்தது. அந்தப் பெண் பெருமாளைப் பற்றின்னு சொன்னதால அவள் வைணவக் குடும்பத்தைச் சேர்ந்தவள் என்று தெரிந்தது.

மறுநாள் காலை 11 மணி இருக்கும். கமலி மேலும்  மூணு பேருடன் வந்தாள்.

“மாமி, இது எங்க சித்தி அம்புஜம். இது என் தம்பி கண்ணன். இது எங்க அடுத்தாத்து வனஜா மாமி,” என்று அறிமுகம் செய்து வைத்தாள். அவர்களை உட்காரச் சொல்லிவிட்டு, “கமலி! நான் சுலோகம் சொல்லித்தருவேன்னு ஒனக்கு யார் சொன்னா?”

என்னுடைய ஆவலை அடக்க முடியாமல் கேட்டேன்.

“யாரு சொன்னான்னு ஞாபகம் இல்லை. ஆனா நீங்க திருவாசகம் முற்றோதலுக்கு உங்க அம்மாவோட வந்ததப் பார்த்திருக்கேன். இங்க இருக்கற மாமியெல்லாம் முற்றோதலுக்குப் போகமாட்டா. ஆனா நீங்க ஒங்க அம்மாகூட வந்தது வித்யாசமா இருந்தது. நீங்க கோலாட்டம் ஆரம்பிச்சு நடத்தினதப் பாத்ததால ஒங்ககிட்ட கேக்கலாம்னு தோணித்து” என்றாள்.

சரி, ஒனக்கு என்ன சுலோகம் கத்துக்கணும்?

“லக்ஷ்மி அஷ்டோத்தரம். நாராயணீயம், சௌந்தர்யலஹரி, விஷ்ணு சஹஸ்ரநாமம்,” என்று தொடங்கியதுமே நான் இடைமறித்தேன். “ஏன் கமலி, எல்லாம் ஸம்ஸ்க்ருத சுலோகங்களாகவே இருக்கே? தமிழ்ல சுலோகங்களே இல்லியா?” என்றேன்.  அவளுக்கு பதில்சொல்லத் தெரியவில்லை.

நான் அப்படிக் கேட்பேன்னு எதிர்பார்க்கலையோ?

“நீ வைஷ்ணவப் பெண்தானே? நாலாயிர திவ்யப்ரபந்தம் சொன்னால் ஒங்க பெருமாள் ஏத்துக்கமாட்டாரா? அதைச் சொன்னால் புண்ணியம் கிடைக்காதா?”

கமலியைக் கொஞ்சம் சீண்டினேன்.

உடனே கமலியின் சித்தி அம்புஜம், ”பெண்களெல்லாம் நாலாயிரம் சொல்லக் கூடாதாம்!” என்றாள்.

Image result for ஆண்டாள்

கோதை நாச்சியார்

“இது என்ன அநியாயமா இருக்கு? நீங்கள்ளாம் திருப்பாவை சொல்றதில்லையா? நாச்சியார் திருமொழி, திருப்பாவை பாடிய ஆண்டாளே பெண்தானே? அவள் பாடிய பாடல்களை நாலாயிரத்தில் சேர்த்திருக்காளே! அதை வேதமனைத்திற்கும் வித்தாகும் கோதை தமிழ் என்று பாராட்டுகிறார்களே?

“முன்னாடியெல்லாம் இப்படித்தான் பெண்கள் விஷ்ணு சஹஸ்ரநாமம் சொல்லக்கூடாதுன்னு தடைபோட் டிண்டிருந்தா. பெண்கள் மேடைல பாடக்கூடாதுன்னும் தடுத்துண்டிருந்தா. பரமாசார்யாளின் ஆசீர்வாதத்தோடு எம்.எஸ். சுப்புலக்ஷ்மியின் ஸஹஸ்ரநாம ரிகார்டே வெளியாச்சு!” என்றேன்

“அது என்னவோ ஸம்ஸ்க்ருத சுலோகம் சொன்னாத்தான் பலன் உண்டாம்! எல்லாரும் சொல்லறா!” என்றாள் வனஜா.

“அம்புஜம்! பெருமாள் புறப்பாடு ஆகும்போது பெருமாளுக்கு முன்னால யார் போறா? நாலாயிரம் சொல்லும் கோஷ்டிதானே? வேதபாராயணம் சொல்றவாகூட பெருமாளுக்குப் பின்னாலதானே போறா? கணி கண்ணனுக்காகப் பெருமாளே தன் பாம்பணையச் சுருட்டிண்டு போனாரே! உனக்குத் தெரியும்தானே?”

“காலங்காலமா ஸம்ஸ்க்ருதத்திலதானே சுலோகம் சொல்லறா?” இது அம்புஜம்

“அம்புஜம் ஒனக்கு ஸம்ஸ்க்ருதம் தெரியுமா? ஹிந்தி தெரியுமா?”  இது நான்.

“எங்கே மாமி? ஸம்ஸ்க்ருதம் தெரியாது. நாங்க படிக்கும்போது ஸ்கூல்ல இருந்த ஹிந்தியையும் எடுத்தாச்சு. தமிழ்ல இருக்கறத வெச்சுத்தான் சுலோகம் சொல்லறோம்.”

“ஸம்ஸ்க்ருதத்தில இயற்றப்பட்ட சுலோகங்கள தமிழ்ல பாத்துச் சொல்லும்போது உச்சரிப்பு தப்பு வராதா?” என்று கேட்டேன்.

“அப்படின்ன என்னதான் செய்யறது? எதைத்தான் சொல்லறது?” என்றாள் வனஜா

“ஏன்? தமிழிலேயே தோத்திரங்கள் நெறைய இருக்கே! தமிழ்ல என்னதான் இல்லை? நாலாயிர திவ்ய பிரபந்தத்தில 4000 பாசுரம் இருக்கு. அதே போல தேவாரம், திருவாசகம், திருப்புகழ், திருமுறைகள் அபிராமி அந்தாதி, பதிகம் எல்லாம் இருக்கே. வள்ளலாரும், தாயுமானவரும் எப்படி எவ்வளவு பாடியிருக்கா! நாம புதுசா ஒண்ணும் பாடவேண்டாம். அடியார்கள் பாடியிருக்கறதப் பாடினாலே போறும். ஒரு ஜன்மம் காணாது!  நீயே சொல்லு, அம்புஜம்! ஸம்ஸ்க்ருத சுலோகங்கள் சொல்லும்போது ஒனக்கு பாவம் புரியறதா? அர்த்தம் தெரிஞ்சாத்தானே பாவம் வரும்? நீ பெருமாளின் அழகைப்பத்திச் சொல்லறயா, இல்லாட்டா ஒன்னோட குறைகளைப் போக்கவேண்டிக்கறயான்னு ஒனக்குத் தெரியவேண்டாமா?

Image result for அபிராமி பட்டர்

அபிராமி பட்டர்

 

“தமிழ்ல சொல்லும்போது, தமிழ் உன் தாய்மொழிங்கறதாலும், பேசியும் கேட்டும் பழக்கம் இருக்கறதாலும் நாம என்ன சொல்லறோம்னு கொஞ்சமாவது புரியறது. நீயே பாரு, அபிராமி அந்தாதில என் நெஞ்சத்து அழுக்கையெல்லாம் நின் அருட்புனலால் துடைத்தனைனு சொல்லும்போது தேவி வந்து நம்ம மனசில இருக்கற அழுக்கையெல்லாம் தேச்சுத்தேச்சுக் கழுவி, அலம்பி, நம்ம எல்லாரையும் பளிச்னு ஆக்கிவிட்டமாதிரி தோணும். ஆனா, இதுவே ஸ்ம்ஸ்க்ருதத்தில இருந்தா அந்த உணர்ச்சி சட்டுனு வராது. ஸம்ஸ்க்ருதத்தில நல்ல பாண்டித்யம் இருந்தா அந்த பாவம் வரலாம்.

Related image“இதேபோல சிவபெருமான்கிட்ட என்ன கேக்கணும்னு மணிவாசகர் சொல்லித் தரார்.

வேண்டத் தக்கது அறிவோய் நீ

வேண்ட முழுதும் தருவோய் நீ

“பெரியாழ்வார் கண்ணனின் லீலைகளைப் பத்தி பாடியிருக்கறதப் படிக்கும்போது கண்ணன் நம்மாத்தில வந்து விளையாடறமாதிரி தோணும்.

பச்சைமாமலை போல் மேனி

பவளவாய் கமலச் செங்கண்

அச்சுதா! அமரர் ஏறே! ஆயர் தம்

கொழுந்தே! என்னும்

இச்சுவை தவிர யான் போய்

இந்திர லோகம் ஆளும்

அச்சுவை பெறினும்வேண்டேன்

அரங்கமா நகருள்ளானே!

“இந்தப் பாட்டைச் சொல்லறதுல ஒனக்கு என்ன கஷ்டம்? அர்த்தம் புரியலையா? நான் ஸம்ஸ்க்ருதத்துக்கு எதிரி இல்லை. அதில் எத்தனையோ பொக்கிஷங்கள் இருக்கு. நமக்கு அந்த பாஷை தெரியலைங்கறதுதான் குறையே தவிர, அந்த பாஷைக்குக் குறையே இல்லை. இன்னும் சொல்லப்போனா எங்க தாத்தா — அம்மாவோட அப்பா — பெரிய ஸம்ஸ்க்ருத பண்டிட். ஆனா எனக்கு அந்த பாஷைல பரிசயம் இல்லையே?” என்று விளக்கினேன்.

உடனே கமலியின் தம்பி கண்ணன், “மாமி! எனக்கு படிப்பு நன்னா வரணும்னா அதுக்கு ஸரஸ்வதியைப்பத்தி என்ன சுலோகம் சொல்லணும்? எனக்கு ஸம்ஸ்க்ருதமும் தெரியாது. ஹிந்தியும் தெரியாது. ஏன்? தமிழும் அவ்வளவா வாசிக்கவராது.” என்றான்.

உண்மைதான்! தமிழ்நாட்டின் நிலை இப்படித்தான் ஆகிவிட்டது!

Related image“உனக்கு அவ்வளவாத் தமிழ் தெரியாட்டாலும் உன் அம்மாவுக்குத் தெரியுமே? குமரகுருபரர் ஸரஸ்வதியை வேண்டிப் பாடியிருக்கும் சகலகலாவல்லி மாலைல பத்துப் பாட்டிருக்கே! அதுல அவர் பாட்டு, பொருள், பண் பரதம் கல்வி, சொல் விற்பனம், அவதானம் கவிபாடும் திறமை, வடமொழி, எல்லாம் தருவாய்னு கேட்டிருக்கார்! பாரதியார் பாடியிருக்கும் வெள்ளைத் தாமரைப் பூவில் இருப்பாள் பாட்டும் பாடலாமே?”

வனஜா, “எனக்கு முருகனை ரொம்பப் பிடிக்கும். என்ன பாடலாம்?” என்று கேட்டாள்.

“அருணகிரிநாதரின் திருப்புகழான ஏறுமயில் ஏறி விளையாடு முகம் ஒன்றே பாட்டில் ஆறு முகத்தைப்பத்தியும் பாடியிருக்கார். முருகனைப்பத்தி கந்தர் அலங்காரம் 100 பாடல் இருக்கு. பிள்ளையாருக்கு ஔவையாரின் வாக்குண்டாம், பாலும் தெளிதேனும், விநாயகர் நான்மணிமாலை திருமூலரின் ஐந்து கரத்தனை, சொல்லலாம்.” என்றேன்.

அம்புஜத்திடம், “நீங்கள் ஏன் நாலாயிரம் படிக்கக் கூடாது?” என்று கேட்டேன்.

“அது தமிழில் இருந்தாலும், பிரித்துப் படிக்க கொஞ்சம் கஷ்டமாயிருக்கும்போல தோணறது,” என்றாள்.

“புரியாத, தெரியாத, ஸம்ஸ்க்ருத சுலோகங்களைவிட இது  அவ்வளவு கஷ்டமா என்ன? நான் நாலாயிரம் படிக்கப்போறேன். நீங்க வந்தா சேர்ந்து படிக்கலாம்.”

”மாமி! நானே சித்தியைக் கூட்டிண்டு வரேன். நானும் நாலாயிரம் படிக்கப்போறேன்” என்றாளே பார்க்கலாம்!

அம்புஜம், “மாமி! நான் என்னென்னமோ வேண்டாததெல்லாம் நெனச்சு கொழம்பிண்டேயிருந்தேன். இப்ப அந்த சந்தேகமெல்லாம் போயாச்சு. நாளைலேந்து கட்டாயம் வரேன்.” என்றாள்.

“மாமி, வியாசர் சொல்லச்சொல்ல பிள்ளையார் பாரதம் எழுதினார்னு சொல்லக் கேட்டிருக்கேன். இப்ப டிவில மணிவாசகர் சொல்லச்சொல்ல சிவபெருமானே தன் கையால திருவாசகம் எழுதினார்னு சொன்னா. அதுலேந்து எனக்கு திருவாசகம் படிக்கணும்னு ஒரே ஆசை. அதையும் சொல்லித் தரேளா? நான் நாலாயிரமும் படிக்க வரேன்.” என்றாள்.

“கட்டாயம் வா!” என்றேன்.

எல்லாரும் விடை பெற்றுச் சென்றதும் நிதானமாக யோசனைசெய்து பார்த்தேன். ரெண்டு நாளாக இது என்ன நாடகம்? புரியவில்லை.

எது எப்படியோ. நான் வெகுவாக ஆசைப்பட்டதுபோல தமிழ்த்தோத்திரங்கள்  எங்கள் வீட்டில் ஒலிக்க ஆரம்பித்து விட்டன!

 ***

Advertisements

6 thoughts on “இதென்ன நாடகம்?

  1. மிக அவசியமான உண்மையை வலுவாகக் கூறும் கதை. என் எண்ணத்தில் உள்ளதை அப்படியே பிரதிபலிக்கிறது பதிவு. அர்த்தம் புரியாமல், பாவம் புரியாமல் தமிழில் சமஸ்கிரதத்தை எழுதிவைத்துக்கொண்டு கோவில்களிலும் வீடுகளிலும் பலர் பாடுவதைக்கண்டு எனக்குக் கதையில் எழும் எண்ணமே எழும். பிள்ளைகளுக்கும் சுலோகம் சொல்லிக்கொடுக்கிறோம் என்று படுத்துகிறார்கள்.
    நண்பர்கள் உணர்ந்துபார்த்து தமிழில் தோத்திரங்கள் ஓதவேண்டும்.

    Like

  2. மிக அருமையாகச் சொல்லி இருக்கிறார்கள். நல்லதொரு பகிர்வுக்கு நன்றி. முன்னெல்லாம் பள்ளியிலேயே தேவாரம், திருவாசகம், நாலாயிரம் போன்றவை ராகத்தோடு பாடச் சொல்லிக் கொடுத்து வந்ததாகவும், கடந்த 100 வருடங்களில் தான் அவை மாற்றப்பட்டதாகவும் என் அப்பா சொல்லுவார். திண்ணைப் பள்ளிக்கூட ஆசிரியர்களில் பலரும் தேவாரம், திருவாசகம், நாலாயிரம், கம்பராமாயணம், வில்லி பாரதம் போன்றவற்றை ராகத்தோடு பாடவும், பொருள் சொல்லவும் மாணாக்கர்களைப் பழக்கினார்களாம். பெண்களுக்கு வீட்டிலேயே சொல்லிக் கொடுக்கப்பட்டு வந்தது என்றும் சொல்வார்கள். என் மாமனாரின் சகோதரிகள் வீட்டிலேயே தமிழ், சம்ஸ்கிருதம், பாட்டு போன்றவை கற்றுக் கொண்டதாகச் சொல்வார்கள்.

    Like

  3. குழந்தைகளின் மழலையை பெற்றோர் புரிந்துகொள்வதுபோல் பற்றாளரின் உள்ளத்தை கடவுள் புரிந்துகொள்வார்.

    Like

  4. இந்தக் கதையை (அல்லது) உரையாடலை வளரும் குழந்தைகளிடம் கொண்டுபோய் சேர்த்தால் நல்லது. பெற்றோர்கள் தங்கள் குழந்தைகளுக்கு படிக்கக் கொடுக்கலாம்.. அல்லது படித்துக் காட்டலாம்.. நடக்குமா?

    Like

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s